Ataatsimeersuarneq ingerlalluartoq naammassereernerani Sikuki Nuuk Harbour A/S imarsiornerup aamma umiarsualivimmut qanittunut inuussutissarsiutilinnut periarfissat, inissaqartitsinissamullu annertusiinissamut suliat ingerlateqqippai. Piginnittumiit siulittaasunik atatiinnartitsineq, ingerlatsiveqatigiiffiup suliniuteqarneranut akuerineqarnertut ersarissumik takussutissiivoq.
Sikuki siammasissumik imarsiornikkut sulissutit, inuiaqatigiinnut inuussutissarsiornermullu pisariaqarluinnartut, aalisarneq, assartuineq, angallassineq aamma umiarsuarnik takornariartaatilerineq qitiutippai. Saniatigullu nunat tamalaanut niuernermut atassuteqarneq annertunerulerluni.
Nuummi umiarsualivimmit ukiup iluani kilisaatit amerlasuut tulattartut nalunnginneqarpoq, ukiunilu tulliuttuni Nuummi mittarfissuassap nutaap ammarnerani umiarsuit takornariartaatit tikittartut amerlinissaat naatsorsuutigineqarpoq. Tamanna kilisaatit usingiaasarnerannut aamma turnarounderlutik ilaasunut taliffissamik anginerusumik, aammalu periarfissat pitsaanerusut amerlanerusunillu pisariaqartitsinermik pilersitsivoq.
Umiarsualivimmik alliliineq – 2027-mut piareertussaq
Umiarsualivimmik alliliineq Sikukip suliarisaa, kilisaatinut avataasiortunut sullissiviusinnaasutut tulluarsakkatut naleqqussarneqassaaq, aammali umiarsuarnit allanit taliffigineqarsinnaajumaarluni, soorlu umiarsuit takornariartaatit, oqartussat umiarsuaataat usisaatillu.
Kilisaatit usingiartarneri ingerlaannaq nuunneqarnavianngillat, kisianni naatsorsuutaavoq Qeqertaq Avalleq umiarsualivimmut qanittussanut inuussutissarsiortunut soorlu aalisarnerup iluani suliffissuit, aalisarnermut ikorfartaallutik suliaqartut, qerititsivissuit/nillataartitsivissuit, quersuit aamma sullissinissamik aaqqissuussisartunut sanaartorfigiuminarsarnera ilutigalugu nuukkiartuaarneqarumaarnissaat.
”Umiarsualivimmik alliliineq pingaartillugu iliuuseqarneruvoq, taamaalinikkut aalisarnerup aamma umiarsuarnik takornariaqartitsinermut talittarfissat aamma umiarsualivimmi periarfissat pisariaqartinneqartut sunniuteqarluartumik qulakkeerneqarsinnaassammata. 2027-imiit umiarsualiviup tulluarsarnikkut nikerarluartitsisinnaanissaanut annertuumik sunniuteqarumaarpoq,” Steen Montgomery-Andersen siulersuisut siulittaasuat oqaaseqarpoq. ”Ingerlatsinerup aamma umiarsualiviup ineriartortinneqarnera ilutigiitillugit ingerlanneqarsinnaaneri, siulersuisuniit sulissutigineqartut tulluusimaarutigaarput.”
Naalakkersuisut Siulittaasuat Múte B. Egede, ataatsimeersuarnermi ima oqaaseqarpoq:
“Naalakkersuisuttaaq Nuummi umiarsualivimmik allilerinissaq qilanaaraat. Umiarsualivimmik allilerineq ilaatigut umiarsuarnut takornariartaatinut aalisariutinullu inissaqartitsinerulernermik kinguneqartussaavoq. Suliniutini taakkunani Sikukip suliassaq kivissagaa, imarsiorluni inuussutissarsiornermut neriulluarnartumik ineriartortitsinissamut pitsaanerusunik tunngavissaqalersitsisussatut, Naalakkersuisut aamma naatsorsuutigaat.
Naatsorsuutigaarpullu aamma mittarfiit nutaat atulernerisigut takornariaqarnerinnaanngitsukkut kisiannili nunatta avataani aamma toqqaannaq avammut niuerutigut pingaarnerusut aamma umiarsualiveqarnikkut pitsaasumik toqqammaveqassasut taamaalilluni aalisartortatsinnut inuiaqatigiinnullu inuussutissarniornikkut siuariartornissamut tamanna aamma toqqammavissiilluassammat.”
Sulissutit annertusiartortut naammassiniarlugit aamma angallatinut minnerusunut annerumaanullu inissaqartitsineq pisariaqarpoq. Tamanna puttasorsuarmik ninngusuunik aaqqiivigineqassaaq, naatsorsuutaavorlu 2024-imi ukiami piareernissaat.
Siulersuisut qinigaaqqipput, ukuuppullu:
- Steen Montgomery-Andersen, Siulersuisuni siulittaasoq
- Ujarak Rosing Petersen, siulersuisuni ilaasortaq
- Heidi Jeremiassen, siulersuisuni ilaasortaq
- Marie-Louise Frederiksen, siulersuisuni ilaasortaq
- Thomas Bendtsen, siulersuisuni ilaasortaq
Annerusumik paasisaqarumagaanni siulersuisut siulittaasuat Steen Montgomery-Andersen aamma pisortaaneq John Rasmussen maana attavigineqarsinnaapput [email protected] / +299-559450 og [email protected] / +299-553750
