Marlunngornermi 7. juli 2026 Sikuki Nuuk Harbour A/S-ip Nuummi umiarsualiviup Qeqertaq Avallermi allilerneqarnissaanut pisortatigoortumik nivariaqqaarneq malunnartippaa – pilersaaruteqarfiusumi qaartitsinermik nalliuttorsiutigineqartumik.
Ineqarnermut, Attaveqaatinut, Isorliunerusunut Upalungaarsimanermullu Naalakkersuisoq Iddimanngiiu Jensen Bianco pisortatigoortumik aaqqissuussinermi siuttuuvoq, pisortaanerlu John Rasmussen tikilluaqqusilluni.
Oqalugiaammini Naalakkersuisup erseqqissarpaa Nuummi umiarsualivik Kalaallit Nunaannut tamarmut pingaaruteqarluinnartumik qitiusumik inissisimasoq, umiarsualiviullu allilerneqarnera Naalakkersuisunit nunatta attaveqaasersuutaanik pingaarutilinnik ineriartortitsinissamut siunnerfilimmik suliniuteqarnerannut ersiutaasoq.
“Umiarsualivik inuiaqatigiinni uummataavoq – pilersuinerup isumannaatsuuneranut tunngaviuvoq, umiarsualivillu allilerutsigu, nunarsuarmut periarfissagut annertusissavagut,” Naalakkersuisoq Iddimanngiiu Jensen Bianco ilanngullugu oqarpoq.
Pilersaarut pillugu
Umiarsualiviup allilerneqarneratigut Nuummi umiarsualiveqarnermi attaveqaasersuutit annertuumik nukittorsarneqassapput, ilaatigut makku ilanngullugit:
- Kilisaatit talittarfiat nutaaq 200 meterisut takissusilik
- Sakkutuut umiarsuaannut talittarfik, allanit aamma atorneqarsinnaasoq, 150 meterisut takissusilik
- 25.200 m²-itut annertutigisumik umiarsualiveqarfik, nutaaliaasunik umiarsualiveqarnermut atortorissaarutilik
Umiarsualiviup allilerneqarneratigut talittarfissaqarnikkut periarfissat annertunerulissapput. Tamanna umiarsualivimmut attuumassuteqartumik inuussutissarsiuteqartunut iluaqutaassaaq, Illersornissaqarfillu talittarfissaqarnikkut pitsaanerusunik periarfissaqalissalluni. Tamatuma peqatigisaanik maanna umiarsualiviusumi talittarfissaq assut pisariaqartinneqartoq inissaqarnerulissaaq. Taamaalilluni umiarsuit takornariartaatit talittarnerat, takornariaqarneq kiisalu umiarsualivimmik atuisut allat periarfissaat ineriartortinneqarsinnaanerulissapput.
Pilersaarut novembari 2028-mi naammassineqassasoq naatsorsuutigineqarpoq.
“Umiarsualivik tassaannaanngilaq betoni, sisak pituffiilluunniit – umiarsualivik tillerneruvoq. „Tassani pineqarput ulluinnarni nioqqutissanik sanaartornermilu atortussanik pilersuineq; kilisaatit aalisartullu avammut nioqqutigineqartussanik tulaassisarnerat; takornariat Kalaallit Nunaannik misigisaqarusuttut; aammalu Illersornissaqarfik, ujarlernermik annaassiniarnermillu suliaqarlunilu imartatsinnik illersuisoq,” John Rasmussen oqalugiaammini oqarpoq. „Allilerineq ullumikkut aallartitarput Nunatta siunissaanut aningaasaliineruvoq.”
Naalakkersuisup aamma erseqqissarpaa umiarsualiviup allilerneqarnera atuisut akiliuteqartarnerisigut aningaasalersorneqartoq. Umiarsualivimmik atuisunit isertitat umiarsualivimmut toqqaannartumik aningaasaliissutigeqqinneqartarput – aaqqissuussineq tamanna umiarsualiveqarnermi attaveqaasersuutit ingerlaavartumik aserfallatsaalineqarnissaannut ineriartortinneqarnissaannullu qulakkeerinnittuuvoq, inuussutissarsiortunut inuiaqatigiinnullu tamarmut iluaqutaasumik.
Sikuki suleqatigisaminut, pilersuisunut kiisalu suleqatigiissitalianut tamanut suliniutip piviusunngortinneqarnissaanut periarfissiisunut annertuumik qujavoq, KJ Greenlandillu suliniutip piviusunngortinnissaanut pitsaasumik kinguneqarluartumillu suleqatigineqarnissaa qilanaaraa. Sikukip Kalaallit Nunaanni umiarsualiveqarnermi attaveqaasersuutit ineriartortinneqarnissaannut politikkikkut annertuumik tapersersuisoqarnera aamma nuannaarutigaa.